Mbingarkesa në Pediatrinë e QKUK-së

Raportohet për mbingarkesë në repartin e Pediatrisë në Qendrën Klinike Universitare të Kosovës (QKUK), ku në disa raste dy fëmijë janë vendosur në një shtrat për shkak të mungesës së hapësirës

Klinika e Pediatrisë në Qendrën Klinike Universitare të Kosovës (QKUK) është përballur me mbingarkesë të theksuar gjatë kësaj periudhe, duke u detyruar në disa raste që dy fëmijë të ndajnë të njëjtin shtrat.

Drejtoresha e Klinikës së Pediatrisë, Dr. Violeta Grajçevci-Uka, ka sqaruar se kjo mbingarkesë lidhet kryesisht me shpërthimin e virozave të ndryshme sezonale. Sipas saj, në emergjencën pediatrike kryhen deri në 150 vizita brenda 24 orëve, ndërsa në ambulancat specialistike realizohen deri në 100 vizita të tjera.

“Si çdo vit në këtë periudhë, përballemi me një fluks të madh pacientësh për shkak të virozave sezonale. Brenda 24 orëve, kemi deri në 30 pranime të reja, kryesisht me probleme respiratore. Këto pranime bëhen bazuar në indikacionet dhe gjendjen klinike të pacientëve. Në raste mbingarkese, ndodh që të vendosim nga dy pacientë në një shtrat,” – shpjegoi Dr. Grajçevci-Uka.

Për të përballuar këtë situatë, në Klinikë aplikohet një proces triazhimi i shpejtë për të liruar vendet, duke dërguar fëmijët që kanë stabilizuar gjendjen në shtëpi. Sidoqoftë, për shkak të natyrës së sëmundjeve, shpesh është e pamundur që fëmijët të zhvendosen në reparte të tjera.

“Pediatria trajton raste të ndërlikuara, përfshirë fëmijë me sëmundje kronike dhe imunitet të komprometuar. Kjo e bën të rrezikshme vendosjen e tyre në të njëjtat dhoma me fëmijë me infeksione respiratore. Me një menaxhim të mirë nga shefat e reparteve dhe mjekët, arrijmë ta minimizojmë kohëzgjatjen e kësaj dukurie,” theksoi ajo.

Angazhimi për shërbim profesional

Pavarësisht sfidave, qëllimi kryesor mbetet ofrimi i një shërbimi cilësor dhe profesional për çdo fëmijë që kërkon trajtim.

Dr. Grajçevci-Uka u bëri thirrje prindërve që të tregohen të durueshëm dhe të mirëkuptojnë situatën, ndërsa klinika po bën maksimumin për t’u përgjigjur nevojave të të gjithë pacientëve.